Մեդիա ուղևորություն դեպի Սևանի ջրհավաք ավազան «Պոնտոս ծրագրի» պիլոտային տարածք

Մեդիա ուղևորություն դեպի Սևանի ջրհավաք ավազան «ՊՈՆՏՈՍ» ծրագրի պիլոտային տարածք

«ՊՈՆՏՈՍ» ծրագրի շրջանակներում Սևանի ջրհավաք ավազանում ս.թ. սեպտեմբերի 13-ին իրականացվել է մեդիա ուղևորություն լրագրողների և լրատվամիջոցների համար:

Շրջայցի նպատակն էր լրագրողներին և լրատվամիջոցների ներկայացուցիչներին ներկայացնել «ՊՈՆՏՈՍ» ծրագրի ուսումնասիրության տարածքները Սևանի ավազանում և դրանց մոնիթորինգի մեթոդները՝ կիրառելով արբանյակային պատկերները։ Շրջայցի օրակարգում էին հետևյալ տարածքներն ու թեմաները՝

• Հայրիվանք - ջրային բուսականության ուսումնասիրություն
• Նորատուս - կոշտ թափոնների և կեղտաջրերի խնդրի ուսումնասիրում
• Այց դեպի անտառների հատված
• Լիճք - այց դեպի ճահիճների և ձկնաբուծարանի տեղամաս
• Այց դեպի Մարտունի գետ

Շրջայցի ժամանակ «ՊՈՆՏՈՍ» ծրագրի հայաստանյան գործընկերների հետազոտողները ներկայացրել են յուրաքանչյուր տարածքում առկա խնդիրները, այն լուծումները և աջակցությունը, որը հնարավոր է ապահովել սույն ծրագրի շրջանակներում: «ՊՈՆՏՈՍ» ծրագիրը մեծամասամբ նպաստում է Հայաստանում համապատասխան կառույցների ներկայացուցիչների կարողությունների զարգացմանը, հետազոտությունների համար մեթոդաբանության մշակմանը, ինչպես նաև առկա հրատապ խնդիրների վերհանմանը:

Ծրագրի վերջնարդյունքները ներառում են մի շարք դրական գործողություններ Հայաստանի և գործընկեր երկրների համար: Մասնավորապես`

1. «ՊՈՆՏՈՍ» հարթակի ստեղծում, որը ներառում է տվյալների խորանարդ (Data Cube), WebGIS և Web հավելված: Սա հնարավորություն է ընձեռում քաղաքականություն մշակողներին, լրագրողներին, հետազոտողներին, ուսանողներին և յուրաքանչյուր հետաքրքրված քաղաքացու ստանալ արագ վերլուծություն «ՊՈՆՏՈՍ» ծրագրի պիլոտային տարածք Սևանա լճի վերաբերյալ: Հարթակը հնարավորություն է տալիս վերահսկել, գնահատել և ուսումնասիրել մասնավորապես հետևյալ խնդիրները`

• Չափումներ լճի էվտրոֆիկացիայի վերաբերյալ
• Չափումներ հարակից անտառածածկի և դրա փոփոխությունների վերաբերյալ
• Չափումներ լողացող բուսականության վերաբերյալ:

1. Հարթակն ապահովում է սևծովյան ավազանի վերաբերյալ միջսահմանային բնապահպանական մոնիտորինգի համապատասխան տվյալների և տեղեկատվության մատչելիությունն ու արդիականացումը:
2. Գործընկերների կողմից մշակված կրթական նյութերի և ռեսուրսների, ինչպես նաև կարողությունների զարգացմանն ուղղված միջոցառումների միջոցով ծրագիրը նպաստում է համախմբված և միատեսակ մեթոդոլոգիայի մշակմանն ու կիրառմանը ծրագրի բոլոր պիլոտային տարածքներում:
3. Ծրագրի գործընկեր երկրներում համագործակցող թիմի ստեղծում, որն իր հերթին համախմբում և ներգրավում է տեղական մասնագետներին ու նաև ապահովում կապը գործընկեր երկրների մասնագետների միջև: Սա էականորեն նպաստում է տվյալների փոխանակմանը «ՊՈՆՏՈՍ» ծրագրի գործիքների միջոցով:
4. Ծրագիրն ապահովում է իրազեկվածության բարձրացում ջրի որակի և դինամիկայի վերաբերյալ:

 «ՊՈՆՏՈՍ» ծրագրի մասին հավելյալ տեղեկատվության համար կարող եք այցելել ծրագրի կայքէջ հետևյալ հասցեով՝ http://pontos-eu.aua.am/:

Հայաստանի ամերիկյան համալսարանի (ՀԱՀ) Յակոբեան բնապահպանական կենտրոնը և ՀՀ բնապահպանության և ընդերքի տեսչական մարմինը չորս այլ գործընկեր կազմակերպությունների հետ համատեղ 2020թ. հուլիսի 1-ից մեկնարկել է «Սևծովյան ավազանում շրջակա միջավայրի մոնիտորինգ Կոպերնիկուս համակարգի միջոցով» (ՊՈՆՏՈՍ) ծրագիրը: Երեսուն ամիս տևողությամբ ծրագիրն իրականացվում է ԵՀԳ Սևծովյան ավազանի երկրների անդրսահմանային համագործակցության 2014-2020թթ. ծրագրի համաֆինանսավորմամբ: