ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԲՆԱՊԱՀՊԱՆՈՒԹՅԱՆ ԵՎ ԸՆԴԵՐՔԻ ՏԵՍՉԱԿԱՆ ՄԱՐՄԻՆ
ԲՆԱՊԱՀՊԱՆՈՒԹՅԱՆ ԵՎ ԸՆԴԵՐՔԻ ՏԵՍՉԱԿԱՆ ՄԱՐՄԻՆ
Այսօր ՀՀ բնապահպանության և ընդերքի տեսչական մարմնի ղեկավար Հովհաննես Մարտիրոսյանը հանդիպել է Երևանի պետական համալսարանի կենսաբանության ֆակուլտետ պրոֆեսորադասախոսական կազմի հետ։
Հանդիպմանը մասնակցել են նաև ԲԸՏՄ ղեկավարի տեղակալ Վ.Գալոյանը, Կենսաբազմազանության վերահսկողության վարչության պետ Գ.Խաչատրյանը, ԵՊՀ կենսաբանության դեկանի տեղակալ կ.գ.թ. դոցենտ Կ.Ղազարյանը, Կենդանաբանության ամբիոնի վարիչ կ.գ.թ. դոկտոր-պրոֆեսոր Մ.Առաքելյանը, Կենսաբանության գիտահետազոտական ինստիտուտի տնօրեն կ.գ.թ. դոցենտ Ա.Եսայանը։
Հանդիպման ընթացքում քննարկվել են փոխշահավետ համագործակցության ուղղությունների՝ ուսումնակրթական բնույթի ծրագրերի, համապատասխան ոլորտներում փորձաքննությունների իրականացման, աշխատությունների, մոնիտորինգների, հետազոտությունների, երկկողմանի հետաքրքրություն ներկայացնող վերապատրաստումների, նաև ուսանողների ուսումնական, արտադրական, նախաավարտական և գիտաարտադրական պրակտիկաների անցկացման վերաբերյալ մի շարք հարցեր։
Այցի ընթացքում ներկայացվել է ժամանակակից սարքավորումներով հագեցած լաբորատորիան, որտեղ հնարավոր է իրականացնել բուսական, կենդանական, ինչպես նաև հողի, ջրի միկրոօրգանիզմների բացառիկ փորձաքննություններ և հետազոտություններ։
Հանդիպման ավարտին ձեռք է բերվել պայմանավորվածություն՝ մեկտեղելով կողմերի ջանքերը, միջոցները և փորձը, կյանքի կոչել կադրերի մասնագիտական հմտությունների և կարողությունների զարգացման ծրագրերը։
