Ապագա երկրաբանների մասնագիտական զարգացում՝ «GeoLab. ապագայի միջավայր»-ում

Այսօր Բնապահպանության և ընդերքի տեսչական մարմնի ղեկավար Հովհաննես Մարտիրոսյանը մասնակցել է Երևանի պետական համալսարանի աշխարհագրության և երկրաբանության ֆակուլտետի ու Կապանի լեռնահարստացման կոմբինատի համատեղ նախաձեռնությամբ կազմակերպված «GeoLab. ապագայի միջավայր» խորագրով միջոցառմանը, որը նվիրված էր կողմերի միջև ձևավորված մեկ տարվա արդյունավետ համագործակցությանը և ապագա երկրաբանների մասնագիտական զարգացման խթանմանը։

Միջոցառման շրջանակներում բացվել են հիմնանորոգված և ժամանակակից տեխնոլոգիաներով հագեցած նոր լսարաններ, «Geo Lab» լաբորատորիան, մեկնարկել է նաև «Պատանի երկրաբան» դպրոցը։

Նախաձեռնությունը կարևոր դերակատարում կունենա ինչպես ԲԸՏՄ-ԵՊՀ փոխգործակցության շրջանակներում կարողությունների բարելավման, այնպես էլ կրթական համակարգի ու աշխատաշուկայի փոխկապվածության ամրապնդման, մրցունակ մասնագետների ձևավորման գործում, որը կծառայի անվտանգ ու կայուն միջավայրի զարգացմանը։