Հանդիպումներ Արարատի մարզում․ այրումների կանխարգելման ու բացառմանն ուղղված միջոցառումներ

ՀՀ բնապահպանության և ընդերքի տեսչական մարմնի ղեկավար կազմը՝ մարզային հանդիպումների շրջանակում փետրվարի 14-ին այցելել է Արարատի մարզ։

Հանդիպմանը ներկա են եղել Տեսչական մարմնի ղեկավարի տեղակալներ Վ.Գալոյանը, Վ.Ամիրխանյանը, Արարատի մարզպետ Ս.Թևոնյանը և խոշորացված համայնքների ղեկավարներ։

Հանդիպման ընթացքում մարզպետի, համայնքապետերի և այլ շահագրգիռ անձանց հետ քննարկվել են կենցաղային աղբի, խոզանների, աղբավայրերի, եղեգների, չորացած տերևների, գյուղատնտեսական հանդակներում բուսածածկույթի այրման հետևանքով մթնոլորտային օդի աղտոտման հարցեր։

Ներկայացվել են այրումների հետևանքով առաջացած մթնոլորտային օդի, մարդու առողջության, կենսաբազմազանության և հողի օրգանական կազմի վրա ունեցող բացասական ազդեցությունները։

Տեղական ինքնակառավարման մարմինների ղեկավարներին, որպես շրջակա միջավայրի պահպանության առաջնային օղակ, առաջարկվել է ձեռնարկել միջոցներ՝ համայնքներում այրման դեպքերը կանխարգելելու և բացառելու ուղղությամբ։

Մարզային այցի շրջանակներում, ՏԻՄ պատասխանատուների հետ համատեղ, Վերին Արտաշատ համայնքում կայացել են հանդիպումներ տեղի բնակչության հետ՝ վերոգրյալ խնդիրների լուծման նպատակով, որոնց ընթացքում  իրականացվել են իրազեկիչ-բացատրական աշխատանքներ։

Միջոցառումները կրում են շարունակական բնույթ։